حميد آرغيش
نئچه لحظه ايدي كي، تيكانلي مفتيللرين آرخاسيندا دوُرموش، ماراقلا او تايا باخيردي. تيكانلي مفتيللردن نئچه متر اوياندا، انلي چاي، اؤزونو ساحيلين داشلارينا چالا ـ چالا قارانليقدا محو اولوردو.
نئچه گون ايدي بو منطقهيه عسگر وئريلميشدي. هله اؤزونه بير يولداش تاپا بيلمهميشدي.
نئچه يئردن چايين اوستونه كؤرپو سالينميشدي. كؤرپولرين اطرافيندا زنجير، زنجيرلرين كناريندا سيلاحلي عسگرلر.
ايليق هاوادا، كنارينداكي كؤرپويه باخدي. ايكي ساحيلي بير ـ بيرينه قوووشدوران كؤرپو اوسته كيمسهني گؤره بيلمهدي. درين بير سوكوتدا، سويون سورعتله شيريلتي سسيندن، قولاقلاري قاماشيردي. هئچ اوميدي يوخ ايدي بورايا دوشسون! اؤلكهنين سون سرحددي بيليردي بوراني! درسليك جغرافي كيتابلاريندا بئله اوخوموشدو. "آرش"ـ ين يايي و قدرتلي قوللاري نئچه لحظه گؤزو اؤنونده داياندي... شيرينبير افسانه بو...
اوز به اوز ساحيلدن سرين بير يئل تانيش بير ماهني سسيني گتيردي بو تايا، سودان، مفتيللردن آشا ـ آشا… اوشاقليقدا دا بئله بير ماهنيني دينلهميشدي، آناسيندان و آتاسينين سازينين تئللريندن… بورايا گلمهدن دئميشديلر: "اؤلكهنين سرحددينده خيدمت ائتمهيه گئديرسيز!! چوخ احتياطلي اولماغينيز گرهك دير…". نئچه لحظه درين بير اوچورومون تكينده اؤزونو گؤردو، ابهاملي سسلر ايچره… دريندن تؤوشهدي. اللريني اطرافا آچيب قارانليغا بورونن عطيرلي هاواني دريندن سينهسينه چكدي. چوخ تانيش ايدي بو هاوانين قوخوسو. يونگوللوك دوُيوردو اؤزونده… بير داش گؤتوروب تيكانلي مفتيللر اوستوندن سويا آتدي… اوز به اوز ساحيلده چوخ اوُزاقلاردا، بعضي يئرلرده چيراقلار بنك ـ بنك يانيرديلار...او تايدان ايسه بير داش سويا آتيلدي. ديقّت ائتدي؛ اونو گؤردو. اؤزو كيمي بير عسگر ايدي او. الين ترپتدي بونا! سونرا ساغ الين ايرهلي اوزاتدي. سانكي بونلا گؤروشمك ايستهييردي! آرالاريندا انلي بير چاي اولسادا الينده بير قيزغينليق و ايستيليك دويدو. اورهيي شيدتله دؤيونمهيه باشلادي.
آخشام ياتاغا گيرهندن، سحرهجن هئچ ياتا بيلمهدي. بوغازينا بير زاد تيخيلميشدي سانكي. ايندييهجن بئله بير وضعيتله قارشيلانماميشدي... سورعتله آخان چاي، هر ايكي اؤلكهنين آدينين بير اولدغو، تانيش ماهنيلار و هر زاددان آرتيق تيكانلي مفتيللر اونو فيكره سالميشدي.