حميد آرغيش
قارانليق اؤزونو پنجرهنين شوشهلرينه سورتوردو. تاواندان آسلانميش كؤزهرمه لامپانين ايشيغي اؤز دؤورهسينه دوشوردو. اوتاغين بير بوجاغيندا ديزلريني قوجاقلاييب، اوتورموشدو. آچيق گؤزلري اوتاغين يالنيز بوم ـ بوش تاقچاسينا زيللهنميشدي… آييلير. قارانليق هله اؤزونو پنجرهدن ايچري سوخماغا چاليشيردي.
قولاق ياتيرتدي... "دئيهسن قاپي چالينير...". گيزلي بير قورخو جانينا دولدو. "كيم اولا بيلر؟!"
آياغا دوراندا اينلهييردي. بير كؤهنه خستهليك آياغيندان ياپيشميشدي سانكي.
ـ "كيمسن؟!" ـ سسينده قورخو ايزي وار ايدي.
ـ "مكتوبوز وار.."
قاپييا دايانير.. "كيمدن؟!" ـ دوشوندو. "بلكه بو بير دوزاق دير مني اؤلدورمك اوچون.."
ـ "خانيم آچين قاپيني."
سينه اورهيينه دار اولور. آلينين تريني سيلير.
ـ "من سحرهجن بورادا دايانا بيلمهرم.."
قاپيني آچاندا گنج بير اوغلاني گؤرور، بير چانتا چييينيندن آسيلي.. هله ده قورخوسو وار ايدي. قونور گؤزلريله اوغلاني سوزدو. اوغلان يئر ايله گؤي آراسيندا ـ يئردن اوجادا ـ دورموشدو. قيافهسي جاذيبهلي ايدي.
ـ "كيمدن دير؟!"
ـ "تانريدان."
ـ "تانر...!" سؤزونو قوْرتارمادي.. اونا طرف اوزانان مكتوبا زيللهنير.. آغ پاكات توي گونون ياشماغين نظرينه سالدي... كناريندا دورموش آداخليسينا باخير. اونا گولومسهيير... ياشي اوتوزدان يوخاري اولسادا اونون آلتون ساچلارين اؤپمك ايستهيير.
ـ "آلين قول چكين.."
مكتوب هله اونا ساري توتولموشدو. "آللاه ايندي نييه جاواب گؤندهرير؟!.."
قاپيني چاليب ايچري گئتمك ايستهيير. اوغلان آياغيني قاپي آراسيندا قويور.
ـ "آلماميش گئده بيلمزسيز!"
ألين مكتوبا اوزالدير.. توتور. سرت ياپيشير. بير دفتر گؤزو اؤنونده ظاهير اولور. دفتر اوسته بير قلم شاخ دورموشدو، داياقسيز.. قلمدن ياپيشير: "سني هلهده سئويرهم دونيالار قدهر"، يازير، قول چكير. اوغلان قئيب اولور... قارانليق آلير يئريني.. اوتاغا قاييدير...
مكتوبو تلهسيك آچير. تعجبله اونون ايچينه باخير. بير حب، آغ كاغيذا ياپيشيب. نئچه آن فيكره دالميش حالدا، حبه باخير.. "آللاه درمانيمدير مي اؤلوموم مو؟" دئيه دوشونور. اختيارسيز قاپي آغزيندا اولان دهمير بير كاسا ايله تاي قولپا گؤزو ساتاشير..
ياتاغا گيرهركن: "حؤكم اونون حؤكمو دور..." ـ دئيير…
قوْلاقلاري بير زاد سئزير...
ـ " هاچاناجان ياتاجاقسان! مني گؤرمك ايستهميرسن؟...".
سسين تانيش اولدوغونو آنلايير.
ـ "اونون سسي دير... مطبخدن گلير...". سورعتله آياغا قالخير. مطبخين قاپي آستاناسيندا اونو گؤرور، الينده تفسي، تفسيده ايكي چاي... گولومسهيير... قارا ساچلاري پاريلداييردي. تفسيني اونون اليندن آلماق اوچون اونا ساري قاچير: "هاچان گلدين ماراليم؟!" .
ـ "گئجهدن خئيلك گئديردي...سن ياتميشدين...".
مكتوبلا داوانين ماجراسين دئمك ايستهيير..."سؤزمو اينانماز... فيكرائدهر يوخو گؤرموشم...".
قوللاريني آچير. دوْداقلاري، دوداقلارينا قونور... سونرا تفسيني اللرينه وئرير. اوتاغا ساري گئدير... اوغلان آرديجا يولا دوشور.
ايستيكانلارين ترپنتي سسلريندن تفسييه باخير...بيردن اورهيي دؤيونمهيه باشلايير. گؤزلري كيچيلير. ايكي اورهك شكلينده اولان قيزيل بويون باغي، ايستيكانين ايچينده اوزوردو. اوجادان گولور، اختيارسيز..."او بويون باغينا باخ! سنينله منيم اورهييم دير. بير ـ بيرينه قوووشورلار…" قيزيل ساتان دوكانين قاباغيندا اؤزونو گؤردو… نئچهلحظه خياواني آدديملاديلار...
بيردن گؤزلري چاناغيندان چيخير... بويون باغينين اورهكلري آيريلماغا باشلايير... بدهني تيترهيير... اللري قورويور...قان دامارلاريندا دوْنور...پوليس تئلسيزلري اوغولدايير... تفسي اللري آراسيندان آشاغي دوشور...
ايستيكانلارين سينماق سسي قالخماقلا، بير باغيرتي ايله آييلير... اوتاق باشينا فيرلانير... اطرافيندان دهشتلي سسلر گلير، اوجا قهقههلر آراسيندا...اوتاغين ميلهلري تيترهيير... اللري ايله قولاقلاريني توتور. بير سس قولاقلاريندا جينگيلديير... أرينين سسينه بنزهييردي او سس:
ـ "وفاسيز...وفاسيز...".