حميد آرغيش
گونلر دير بورادا يالنيزام. يوخ سانكي بيري واردير. سانيرام تزه گليبدير. بير صندل اوسته اوْتورموش ساكيتجه فيكيرلشيردي..
سون باهارين سون گونلري دير. هاوانين سازاغيندان لوت و چيلپاق آغاجلارين بدنلري أسيرلر. هر طرفه سپهلنميش ساري ـ قيرميزي يارپاقلار يئرده سورونهرك غملي ـ غملي آغيلار اوخويوردولار..
آغاجلاردان ألهنميش يارپاقلاردان بير ـ ايكيسي اونون سويوقدان كئي اولموش اللري اوسته اوتورموش قيزينماق ايستهييرديلر سانكي!..
قيرپينيب، آزاجيق باشيني يوخاري توتدو. آغير بير سوكوت حاكيم ايدي بورايا، قبريستان كيمي.. رنگي ـ روفو بوْزارميش چانتاسيني كنارينا چكدي. سول قوْلون چانتاسي اوسته باسدي.. بير آه چكيب گؤز دولانديردي اطرافينا.. سيرايا دوزولموش بيتوندان تيكيلميش صندللر اوسته كيمسهني گؤرمهدي. گئري دؤندو. كيمسه آرخاسيندا يوخ ايدي. نئچه لحظه آغاجلارين گؤيه توتولموش قورو و بوش أللرينه باخدي.
هله اوشويوردو.. گاهدان بدهنينه آيدين بير تيترهتمه قوْنوردو. أپريميش كؤينهيي نئچه يئردن اوزولموش، ييرتيلميشدي. باشين آشاغي سالدي، دئيهسن اؤزونو سئير ائديردي. نفسين ديشاري وئرهك چپرين اوتاييندا اولان ايكي قاتلي بينايا ساري باخدي. گونشين سولغون ساچاقلاري آلتيندا بينانين كرپيجلري آللانيرديلار. پنجرهلرين بيرينده گونش پارتلاميشدي. بير نئچه آن او پارتلاييشا باخاراق داياندي. سونرا كنار پنجرهنين ميلهلري آرخاسيندا دورموش بير قيزجيغاز باخدي. گؤزلرين سيخيردي او قيجيغاز..
گونلر دير بورادا يالنيزام.. اونون سيجاقلي قوْينونو، محبتلي سؤزلريني، اوخشامالاريني سانميرام اونودا بيلهم.
نئچه دفعه آرا وئرمهدن اؤسكوردو. كؤهنه بير خستهليك ياخاسيندان توتموشدو سانكي. بير دفعه ده اطرافا گؤز دولانديردي. آغاجلارين باشيندا يوُوا باغلايان قوُشلارين يوُوالاريندان هئچ بير قوش باخمير، هئچ بير قوش اوچماييردي. آغاجلارين بيريندن بير كيشي كؤينهيي آسيلي ايدي. نئچه لحظه اونا باخدي. يئل اويان ـ بويانا چكيردي او بدهنسيز كؤينهيي.. آغير سوكوتو آغلاماق و هونكورتو سسي پوزدو بيردن. باشي سينهسي اوسته دوشموشدو. آغلاديقجا آريق بدهني تيترهييردي. مني گؤرهنده آغلاماق سسي داها اوجالدي. نئچه لحظه آغلادي، اوجادان. گاهدان باشيني ياواشجا ترپهديب «بوندان داها بير جنايت اولماز!» دئييردي آغلاياراق. اونون سسي گئتديكجه ضعيفلهييردي. نهايت اينلهمهيه دؤندو هونكورتولري، و سسسيزليكده بوْغولدو. پنجره آرخاسيندا اولان قيزجيغازا باخديم. هله گؤزلرين اوْووردو.. گونش سون ساچاقلارين توْپلاماقدا ايدي...
بيردن اوْتوردوغو يئردن سيچرادي. سانكي ائلئكتريك دوْلموشدو جانينا.. هؤول ايچينده اطرافا باخدي. ايكي عسكر اؤنونده دورموش اللرينده كي جوپلاري ترپهديرديلر.
ـ نه ائديرسن؟!.. ـ عسكرلرين بيري سوْرو وئردي.
ـ كيم سن؟! ـ باشقا عسكر باغيردي.
عسكرلري گؤرهر ـ گؤرمهز آياغا قالخدي. اللريني بوينون كؤكونده دويونلهدي. سونرا آرخاسيني چئويردي عسكرلره، قيچلاريني بير آز آچاراق.. بو ايشه سانكي عادت ائتميشدي ايللر بويو..
بير ـ بيرينه باخديلار عسكرلر. عسكرلرين بيري ايرهلي گليب اونون قولتوق و جيبلريني آرادي.
ـ كيم سن؟! ـ اونو صندل اوسته ايتهلهييب، سوْروسون تيكرارلادي. عسكرلري گؤرهندن اؤزونو ايتيرميشدي. آغزين آچيب بير زاد دئمك ايستهينده:
ـ بورادا نه ائديرسن؟! ـ ديگر عسگر باغيردي.
او عسكردن بو عسكره گؤز دولانديردي. سانكي اونلارين هانسي سوروسونا اؤنجه جاواب وئرمكده آوارا ايدي.
عسكرلرين بيري جوپونو قالديردي. ائله اونون سوروسونو جاوابلادي:
ـ «تزه دوْستاقدان چيخميشام!..» ـ دئدي. داها دوْغروسو سؤزونو قورخودان چئينه ـ توپور باغيردي.
عسكرلر بير ـ بيرلرينه باخديلار.
ـ سوچون نه ايدي؟! ـ جوپون قالديران عسكر سوردو.
ـ «دئيه بيلمهرم.. آخي آديني گتيرسم همن دوْستاغا دؤنمهلييم».
اوزونه دهين شاپالاق باشيني بتون صندله چالدي.. پارچالانميش دوداغيندان قيرميزي بير آغزيندان أنگينه ساري يول آچدي. شاپالاغي ووران عسكر منه ساري دؤندو. نئچه آن منه باخدي. سونرا مني اونا گؤستهرهرك دئدي:
ـ سندن سورو سوْرولاندا جاواب وئر.. اگر بونون كيمي بوْغازيندان آسيلماق ايستهميرسن..
آغزينينين قانين سيلهرك منه ساري باخدي. بير آن گؤزو گؤزومه دويونلهندي. ياشلانميشدي گؤزلري..
ـ «يوخ!..» ـ يالواردي ـ «بونو مندن ايستهمهيين.. جاواب وئره بيلمهرم.. آخي جاواب وئرسم..»
بير آن ساغ قولو تيترهدي. عسكرلرين بيري جوْپلاميشدي اونو..
ـ تئز اول جاواب وئر.. يوخسا باشقا بير سوچ اوسته سوچلانير، دوستاغا گئتمهلي اولورسان..
گؤزلريندن آخان ياشي قولو ايله سيلدي. باشين ديك توتاراق دئدي:
ـ «بيلمهدن آغزيمدان ”بوتؤو آذربايجان“ كلمهسي چيخميشدير».
كناريمداكي آغاجدان بير سس قالخدي. سسه ساري دؤندوم نئچه لحظه.. آغاجين بير بوتاسي سينيب يئره دوشموشدو، باشينداكي قووش يوُواسي ايله..
ـ ايندي نه ائديرسن بورادا.. تئز اول جاواب وئر؟
ـ «اؤنجه آديني گتيرديييم كلمهيه فيكر ائديرديم.. نه اوچون ياساق اولدوغونا، او كلمه مني 10 ايل دوْستاغا..»
بدهنينه ياپيشان آغير جوپلار صندل اوستوندن آسفالتا چالدي اونو. سؤزو ياريمچيق قالدي. جوپلار آلتيندا بوكولدو.. نئچه لحظه يئرده سوروندو.. او دورومدا قولونون سينماسين دا دويدوم..
عسكرلرين بيري اونا ساري أييلدي. قولوندان توتوب گوجله قالديردي اونو. آنجاق سينيق قول اؤز چوئرهسينه دولاندي. آسفالت اوسته نئچه قيرميزي لكه قوْنموشدو.
گؤزلري يومولموشدو قاندان. عسكر قولون اؤتورهنده آياق اوسته دورانماييب يئره سريلدي. عسكرلرين بيري ساغ ديگر عسكر سول قيچيندان توتاراق اونو يئرده سورويهرك آپارماغا باشلاديلار. بير آن گؤزلرين آچدي.. آغاجلارين آرخاسيندا قالان بينايا ساري باخدي. سونرا گؤزلري منيم اوزومده آچيق قالدي. قيزجيغاز پنجرهنين آرخاسيندا أللرين اوزونه باسميشدي.
عسكرلر اونو يئرده سورويهرك دئييب ـ گولمكدهكن باتييا ساري آدديملاييرديلار:
ـ اين دفعه بايد تا آخر عمرش تو زندان بمونه.. هه ..هه[1]
ـ هه .. هه.. نميدونه.. نميدونه.. بر اساس آخرين قانون فكر كردن هم براي اينها ممنوعه..[2]
سون ائديت: 7 / 7 / 83