حميد آرغيش
عسگر پوتونلاري گؤبهلك كيمي بيتن بؤيوك بير قانقال اوسته قويولدو. قانقال كولو، آغير عسگر پوتونلاري آلتيندا خيرچيلدادي .
گونش اوفوقده باشلاريني بولودلارا سورتن داغلارين آرخاسيندا گيزلنمكده ايكن، سون ساچاقلاريني "آيدين"ين اؤنونده آغيز آچميش قورو چؤلدن ييغيردي... هردن ده بير يئل اسيب، چؤلون توز ـ تورپاغين گؤيه سوووروردو.
آيدين، بئلينه باغلاميش دالليغيني بير حركتله بئليندن آشاغي زويولدتدي. نئچه لحظه سوسوق يئرينده داياندي… سونرا چييينيندن آسلاميش توفنگين چيخارديب، عسگر شلهسي اوستونه آتدي. هاوانين سرين يئلي جانينا دولاندا، بدهني گيزيلدهدي… الين جيبينه آتيب بير سيغار چيخارتدي. سينما آكتييورو كيمي سيغاري داماغينا قويدو. كيبريتين ايلك شعلهسيني اسن يئل سؤندوردو. لاكين ايكينجي كيبريت سيغاري آليشديردي… نئچه دفعه سيغاري ماراقلا سوموردو...
آيدين اوتوز ـ قيرخ ياشلاريندا ايدي. أينينده كي ياشيل پالتارلاري اونا آرتيق اؤتكمليك وئريردي. بيغلاري دوْلو ايدي. اوز ـ گؤزو گون قاباغيندا چوخ قالديقدان قارالميشدي. شيغيجي قوش كيمي كيچيك گؤزلري ديقتله اوزاقلارا زيللهنميشدي...
بيردن دؤورهسينه گؤز دولانديردي... گئنيش بير درهنين اورتاسيندا ايدي. اوزاقلاردا گون باتان طرفدن هوندور داغلار گونشين بينهسي اولوردو... داغين ياخينليغيندا بيتن نئچه آغاج، كؤلگهلرين درهيه اوزاتميشديلار...اوزاقلاردا، بير تپهنين دؤشونده يئرلشن قصبهنين ايشيقلاري بنك ـ بنك يانيرديلار.
آيدين نئچه لحظه گؤزلريني او سمته زيللهدي. آخيردا حسرتله اورادان گؤز چكدي…او دوردوغو يئردن نئچه آدديم اوياندا، ايكي هوندور تابوت شكلينده اولان تاختا ـ قوتو، اوست ـ اوسته قويولموشدولار. تابوت شكلينده اولان قوتولار، هاوانين قارا اؤرتويو آلتيندا صاف بير قارا قايايا اوخشاييردي. زامان اؤتدوكجه چؤل بؤجوكلرينين سسلري ياواش ـ ياواش اوجاليردي.
آيدين كولو اوُزانميش سيغاري يئره آتيب، آياقلادي. سونرا تابوتلارا باخدي… بيردن باش كوماندانين سون سؤزلري قولاقلاريندا جينگيلدهدي:
"بو گئجه «قوردا وئرهن» داغلارينين كناريندا، تانينماميش بير خستهليك اثرينده ايكي نفر اؤلهنين تابوتلاري كناريندا كئشيك چكهجكسن... اونلاري سيناغا چكمك اوچون سحر گليب حكومت طرفيندن خاريجي بير اؤلكهيه آپاراجاقلار... اونلارا ياناشماق سنه خطرلي دير...".
چؤل تيكانلاريندان قوْرولموش و آلوولانماقدا اولان اودون ايشيغي، تابوتلارين يانينادهك يئرده سورونوردو. تيكانلار چيلتيرداياراق آليشيرديلار.
آيدين الينده اولان بوش لوبيا خوشابين قارانليغا توللادي. قولو ايله آغزيني سيلدي. كناريندا يئره دوشموش توفنگين گؤتوروب قيچلاري آراسينا قويدو.
گئجهنين سوكوتونو بؤجوكلرين سسي ايله گوهنلرين چيت ـ چيت سسيندن سئواي باشقا بير زاد پوزموردو. گئجهنين سوكوت و تكراري سسلري گئتديكجه آيديني فيكره ساليردي. گاهدان ديقتله باشين دالي چئويريردي. سانكي آرخادان بير سس دويموش اولسون. گاهدان داقوردا وئرهن داغلارينا باخيردي… كند ده چؤللر قوْشو آديني آلميشدي؛ آنجاق ايندييهجن بئله بير گيزلين قورخو جانينا دوشمهميشدي. توفنگي الينده برك سيخيردي... دهشتلي فيكيرلري اؤزوندن قووماق ايستهسهده، قورخو جانيندان بير آن چيخميردي. بيردن اؤنودهكي داغلاردان بير قوردون اولاماسي قالخدي... قوردون سسي سانكي بير خنجر كيمي آيدينين اورهيينه سوخولدو. بدهني گيزيلدهدي. ائله او حالدا او ماحالدا اولان و اسكيدن قالميش سؤزلر ـ خصوصاً قوردا وئرهن داغلاري حاققيندا ائشيتديكلري ـ يادينا دوشدو. بو آشاغي قصبهده ياشايان باباسيندان بير گون داغدا گؤردويو سوموكلر حاققيندا سورموشدو. او ايسه اونا دئميشدي: "قديملر قوجالاري بو قوردا وئرهن داغينا قويوب گئدهرديلر...قوردلار گليب قوجالاري ديديب، يئيهرديلر... ايشدن دوشموش قوجالارين سونلاري بو ايدي. اونا گؤره بو داغلارين آدي قوردا وئرهن داغلاري اولوب دور".
يئنه قوردون سسي قالخدي. اونون تيترهمكده اولان اللري توفنگي مؤحكم سيخيردي... بيردن توفنگيني قالديريب ناملوسونو ايرهلي اوزاتدي...
گوللـهنين سسي بير بومبا كيمي چؤلون سوكوتونو ياردي… نئچه لحظه اؤتدو. قوردون سسي كسيلدي، سانكي قورد بو اطرافدا اؤز سسيندن داها گورلو اولان بير زادين اولماسيني آنميشدي...
گون باتاندان شرقه ساري گئدن سئيرك بولودلار، گاهدان قولاغي دوشموش آيين اؤنوندن كئچيب آيدين”ين اؤنونده دهشتلي صحنهلر تؤرهديرلر... تيكانلارين آليشماسيندان يئره سريلن اودون ايشيغي گئتديكجه آزالير، قارانليق آيدينا ساري هجوم گتيريردي... گاهدان آيدينين گؤزلري اختيارسيزجا تابوتلارا طرف سوزوردو. آيدينا بئله گليردي كي، تابوتلارين ايچينده ياتان اؤلولرين روحلاري تابوتلارين آرخاسيندا گيزلهنيب، اونو گودورلر... بيردن آي ايشيغيندا تابوتلار اوزهرينده بير دهمير تك جسمين پارلاماسين دويدو.
ـ "سانكي قيفيل دير! " ـ تعجبله اؤزونه دئدي ـ "تابوتلارا قيفيل وورارلار مي؟".
نئچه لحظه فيكره دالدي:
ـ "بلكه ده ايستهميرلر كيمسه اونلارا باخسين!...اؤلونون نهيين گيزلهديرلر؟!".
اوْدون سؤنمهسي فيكرين چاشديردي… گوهن ايله قانقال ييغماق اوچون آياغا دوردو. حيس ائديردي داها بير زاددان قورخمايير. نه تابوتدان، نه ده قوردا وئرهن داغلاريندان! بونون نه اوچون اوْلدوغونو بيلميردي...
اودو آليشديراندان سونرا نئچه لحظه تابوتلارا باخدي. بئينينده قيزغينليق وار ايدي... بير زاد دومسوكلهييردي اونو: "دور آياغا! گؤر نه وار ايچينده!"
آخيردا:
"گؤروم نه وار؟!" ـ دئيه آياغا دوردو. كؤلگهسي تابوتلارين كناريناجان يئرده سورونوردو. تفنگ الده، ياواش ـ ياواش تابوتلارا ياناشدي.
قوردا وئرهن داغلاريندان بير قوردون اولاماسي قالخدي. لاكين آيدين سايمادان اؤز ايشينده ايدي... تابوتلارين بير آدديمليغيندا داياندي. اودون ايشيغيندا تابوتلارين تزه اولدوغونو ياخشي باشا دوشدو. تابوتلارين بير طرفينه تزه بير قيفيل وورولموشدو.
ـ "بونلارين ايچينده اؤلو يوخدور... من أمينم... بيزيم اؤلكهده اؤلولري بير ـ بير اوسته قويمازلار… بس… نه اولار؟!"
درين بير فيكره دالدي. اونلارين ايچينده نه اولدوغونو تخمين ائتمك ايستهييردي.
ـ "حتماً اسلحه دير...يا...يادا تيريهك...".
باشين گؤيه قالديريب، ميريلدادي:
ـ "تيريهك اولورسا بير كيسهسي مني بو دورومدان قورتارار... كنده قاييداركن استعفاء وئريب، "كبينلي آرواد" اولماقدان اؤزومو بوشارام!...".
توفنگين يئره آتدي. اوست تابوتو آغير ـ يونگول ائتمك اوچون اونا بير زور گلدي:
ـ "يوخ! داش ايله دولوبدور سانكي...اؤلو آنلامير بو آغيرليقدا اولور..."ـ دوشوندو.
قورخو بوتؤو جانيندان چيخميشدي. اؤزونون هاردا اولدوغونو لاپ اونوتموشدو... حتي گاهدان قوردون قالخان سسين ده سايميردي.
بيردن يئرينده ساكيت داياندي.
ـ "آخي اصلاً سنه نه؟…"ـ دوشوندو.
لاكين بو فيكير چوخ سورمهدي. ايچريسينده بير زاد قايناييردي: "قيفيلي سيندير...".
توفنگين اله الدي. نه ائدهجهييني بيلميردي...نئچه لحظه ترپنمهدن دوردو. اودون ايشيغي آزاليردي. بيردن توفنگين ناملوسونو قيفيلا اوزاتدي.
بارماغي ماشا اوسته گزدي. آمما هله ماشايا زور گلمهدن:
ـ "گوللـهنين ايزي قالار! قيفيلي داغيلدار…اوندا بيلرلر تابوتلارا من باش چكميشم..." دوشوندو.
نئچه لحظه فيكره دالدي...بيردن توفنگين ناملوسوندان توتوب اسلحهني گؤيه قالديردي. ديبچك قيفيلا دهيركن، قيفيل بير سس وئريب آچيلدي...
احتياطلا قيفيلي چيخارديب يئره قويدو. تابوتون آغير و قالين قاپيسيني چوخ چتينليكله يئريندن قالديردي. باشقا تابوتلار خيلافينا بو تابوت تزه و ياغلانميش بير سيييرتمه اوسته آچيلدي. احتياطلا اللرين تابوتون ايچينه طرف اوزاتدي. اللري بير زادلارا سورتوشدو، دوداقلارينا گولوش قوندو.. آغزي اختيارسيز آچيلدي.
ـ "قيزيل سيككه" ـ اوجادان باغيردي.
سيككهلري آلت ـ اوست ائدهنده، اوزون بير زادلارا اللري توخوندو:
ـ "دئيهسن آشاغيدا اسلحه وار..."
نئچه دفعه سيككهلري اووجونا دولدوروب بوشالتدي. او حالدا دوشوندو:
ـ "بونلارين 60ـ50 دنهسي مني بو آواراليقدان قورتارار ائلهيه بيلهرم گئديب "نيگار"ـ ين اليندن ياپيشام... گؤر نئچه ايل دير كي، چؤل قوشو اولموشام..."
نئچه لحظه تابوتون ايچينده اولان سيككهلره زيللهندي. قيزيللارين يالنيز قارالتيلاريني سئزه بيليردي. بيردن، آستا ـ آستا سؤنمكده اولان اودا طرف گئتدي... دالليغين گؤتوروب تابوتلارا ساري دؤندو...
گونون ايستي شوعالاري گؤزونون قاپاقلارينا دوشنده، گؤزلرين، قيريشديريب آچدي. گئجهدن بير نئچه ساعات گئدهنهدك سئوينجدن اويان ـ بويانا ائشينميشدي.
آيدين اوستونه چكدييي قارا عسگر پتوسون بير طرفه آتيب يئريندن قالخدي. آخشام ياتمادان اؤنجه قالديغي اوددان تكجه اطرافا ياييلميش كوللر قالميشدي. سول قولونا باخاراق:
ـ"ساعات سككيزه اون دقيقه ايشلهيير...ايندي هارادا اولسالار گلرلر...".
توفنگين گؤتوروب اطرافا باخدي. گؤزلري تابوتلارين اوستونده داياندي:
ـ "بونلاري كيم آپاراجاق؟" ـ اؤزوندن سوردو. بونا فيكير ائتمهميشدي.
بيردن بير وئرتوليوت ـ ون ياناشماق سسي، قوردا وئرهن داغلاري آرديندان قولاغينا دهيدي.
ـ "گلديلر..." ـ آيدين دوداق آلتي ميريلدادي.
پتوسون چانتاسينا باغلادي. گئتمهيه حاضير ايدي. گئتديكجه وئرتوليوتون سسي اوجاليردي. بيردن قوردا وئرهن داغلاريندان وئرتوليوتون گؤودهسي آيريلدي...
آيدين تابوتلاردان اوزاقلاشدي. وئرتوليوت گئنيش درهده، تابوتلارين كناريندا يئره اندي. چليملي، كورد پالتاري گئيميش بير كيشي اوندان ديشاري چيخدي. هورت ـ هورت باخان آيدينين، اورادان اوزاقلاشماسينا اشاره ائتدي.
آيدين دؤنوب يولا دوشدو.
ـ "داها راحات اولدوم " ـ اؤزونه دئدي ـ "بونلاري مني گؤرهر...".
آيدين سورعتله ايرهلي گئديردي. ائله او حالدا گلهجهيه نقشهلر تؤكوردو...
بيردن نئچه قورشون سسي وئرتوليوتون سسينده محو اولدو...نئچه گوللـه آيدينين كورهيي اورتاسيندان دهيدي. بدهني تيترهدي. توفنگ بارماقلاري آراسيندان زويوب يئره دوشدو. اؤزو ايسه ديزه چؤكدو، سونرا اوزو اوسته يئره سريلدي. آغزي آچيلميش چانتانين ايچيندن قيزيل سيككهلر يئره تؤكولموشدولر...
كورد پالتاريندا اولان كيشي الينده كي توفنگي يئره آتيب، تابوتلارين كناريندان تاپديغي سيككهني آيدينين داليجا توللادي... سيككه آيدينين اوزو يانيندا يئره دوشدو... نئچه لحظهدن سونرا وئرتوليوت گؤيه قالخدي...
كورد تاپان سيككه تابوتلارين سيككهلريندن ايدي كي، آخشام آيدين چانتاسينا دولدوراندا يئره سالميش، كورد ايسه اونو تاپميشدي.