حميد آرغيش
آي باشين قارا بولودلارين آرخاسيندان ائشييه چيخاريب گوموش ساچلارين كيشينين اوزونه سرهنده، نئيين حزين سسي ائشيديلدي. بير قاپي سس وئرمهدن آچيلدي. هميشه حسرتينده اولدوغون قيزيل آلمالارين بيري آغاجدان اوزولدو. آغاجدان آيريلان آلما ديغيرلانيب باشي گؤرونن و ساكيت آخان ايرماغين سويونا اؤزونو چاتديردي. أللريمي قاباغا اوزاتديم. أللريمين بوش آيالاري گؤزومه دهيدي.
كيشي نئييني دوداقلاريندان اوزاقلاتدي... سوْدا اوزهن آلما بير داش كناريندا داياندي. كيشي يئريندن بير آز قيمزاندي. اونا زيللهنديم. ماوي بير گولوش كيشينين دوداقلاريني بويادي. انتهاسي گؤرونمهين بير چمنليكده بير قيز، قيزيل گوللره بنزهين كيچيك گوللر ايچره اوفوقده قورولموش چاديرا ساري قاچيردي.. قيز بير لالهنين كناريندا چؤمبهلدي.
ألينده بير شوي اولان كيشي، نئي دوداغيندا، حزين سسلر ايچره غرق اولموشكن قيزا ساري گئتدي. اوزاقلاردا دومان ايچره چاديرين قارالتيسي گؤرونوردو. گوموش پول كيمي پارلايان بير دالغاجيق آلماني يولا سالدي.
كيشي اوتوردو. هله نئي دوداغينين كناريندا ايدي. جيبيندن بير تيكه كاغيذ چيخارتدي... مكتوبا چوخ بنزهييردي. ياز رايحهسي وئريردي او كاغيذ. هوسله كاغيذي آچدي.. آي گوموش ساچلارين چؤلدن گؤتوردو. آلما هله سودا دالغالار آراسيندا اوينايا ـ اوينايا گليردي.
كيشي: "اولسون بلكه.."
نئيين سسي يئنيدن اوجالدي. بؤجكلر نئچه لحظه ايدي سوسموشدولار. بير حزين سس قولاغيما دهيدي. "يو..شو.." ـ تئز كسيلدي. داليسين توتماديم.. داش ـ قايالار نئيين سسينده اوزوردولر. كيشي بير داش اوستونده اوتوردو. آخار بير چاي داشين چئورهسيندن اؤزونه يول آچدي… آت كيشنهدي بيردن. داوار قوخوسو بورنوما دهيدي. كاغيذ سو اوسته اوزوردو. آخار چايا باخديم. آلما پارلاييردي… بير ايت هورمهسي قولاغيما چاتدي. بير آز ديقت ائتديم. سانكي كوچهده ايدي. داها هورومهدي… نئيين سسي قالخاندا آت كيشينين يانيندا ايدي. آيين شوعاسي سيزير، وحشيجهسينه چؤلون عطيرلي قوخوسو ايله گؤيدن يئره تؤكولوردو. آت باشين بولادي. آخار سويو اييلهدي. نئچه دفعه سوْيون اويان ـ بويانينا كئچدي. بيردن گونئيه دوغرو قاچدي. آمما بيردن داياندي. باشين گؤيده سايريشان اوُلدوزلارا ساري توتدو. گئري دؤندو. قوزئيه ساري قاچدي. سويون شيريلتيسيندان كيشي اؤزونه گلدي. كاغيذ خئيلك اوزاقلاشميشدي. آي سودا ساكيت دورموشدو. كيشي اللريني سويا باساندا آي بارماقلاري آراسيندان قاچدي… سودا گلن آلماني آختارديم. ياخينلاشميشدي. هميشه بو لحظهني گؤزلهييرديم. كيشينين گؤزلري آلمايا ساتاشاندا سو دالغالاندي. آي سودان ائشييه چيخدي. گؤزلريم قاماشدي. گلين پالتاريندا اولان بير قادين سو اوستونده گؤروندو.
"چال!..خان" دئدي. نئيين سسي گؤيدن يئره اوزاندي. اختيارسيزجا گولومسهديم. بير حزين سس قولاغيما دهيدي. چوخ ياخيندان ايدي. ديكسينيب اويانيرام. اورهييم بتردن چيرپينير. پنجرهمين آلتيندان نئيسسي گليردي...