كيمسه "اونو" ساتميشدي كي، يازين ايلك گونلرينده، عطيرلي و سو پردهسيندن يارانان بير كؤنول اوْخشايان هاوادا قامارلاندي...
گؤزلرينين اؤنونده قارا و اوُلو كؤلگهلر چاخناشيرديلار. آغيزيندا آجي بير آغريني سئزيردي.. اورهيي شيدتله چيرپينماغا باشلاميشدي. دامارلاريندا آخان قانلار دالغالانيرديلار. بدهنينين كئي اولماغين دوُيوردو. تؤوشمهيه دوشموشدو. درين و آغير بير بوشلوقدا گؤروردو اؤزونو.. قوْلاقلاريندا باغيرتي سسلري محو اولوردو...
ـ "دئيهجهيم.. هر نه ايستهسز.." ـ اؤز باغيرتيسيندان داشلاندي.
ايندي كاميل آييلميشدي. اوتاغين اوْرتاسيندا ايدي، ياتاقدا.. نئچه لحظه حئيرانليقلا اؤز اطرافينا باخدي. اوتاغين تاوانيندان قارانليق ياغيردي.. آچيق پنجرهدن گوموش ساچاقلي آيي آختارماغا ترپندي. قارا بولودلار آيي بوغموشدولار.. اوتاغين درين سوكوتو سانجيردي قولاقلارين. يانيندا ياتان قادينا باخدي، اونون چيلغين باخيشلارينا...
ـ "ياديما گلمير.. ياديما گلمير نهلر دئميشم.. هئچ ياديما گلمير نهلر باشيما گتيرديلر.."
ـ "سن كي..." قادين بوغولتو سسله بير زاد دئمك ايستهسهده:
ـ "دينمه.. بير زاد دئمه" ـ اونون سؤزونو كسدي ـ "حتماً يئنه ايستيرسن دئيهسن چوخ فيكر ائلمه... اونلار اينسان يوخ حئيوانديلار.. هر زاد دوزهلجك.."
ـ "يوخ!.. بو دفعه باشقا بير زاد دئمك ايستهييرهم.." ـ قادين توْتقون بير سسله دئدي. ايچريسين يانديران سؤزلري ديشاري تؤكمكدن اوتانيردي.. اوچ آي ايدي كي، اونون بو داورانيشينا اؤزون عادت وئره بيلمهميشدي. او، گئجهلر مختلف وضعيتلرده يوخودان داشلانيردي.. قانتر ايچينده، حئيرانليقدا.. سانكي درين هوشسوزلوكدن آييليبدي. گاهدان دا اونو يئريني باتيرميش گؤروردو.
پنجرهدن أسن يئل پردهني خيش ـ خيشا سالدي. هله درين بير بوشلوقدا چابالاييردي. قادين ايسه درين بير ناراحاتليقدا، سوكوتدا. قادين اونون بو غير عادي ايشلرينه نه سبب اولدوغونو دوشونموردو. باشينا نه گلديييني اوندان سوروشاندا، درين بير بوش اوُچورومدا تاپيردي اونو! قارانليق بير اوتاق.. بدهنينين هئچ بير يئرينده يارا يا أزيلمه ايزي تاپماميشدي. گاهدان دوشونوردو: "قورخودوبلار.. يادا.." بوردا قورخوردو.. "حتماً بئينيني يوْيوبلار" بو بارهده چوخ قورخولو زادلار ائشيتميشدي.
***
يئنه درين بير قارانليق اوُچورومدا چابالاييردي... قادين سوكوتو پوزدو آخيردا:
ـ "ياديندا مي بير گون دئدين شعرلريمله ميلّتيميزين دوشمنلرينه اود ياغديريرام؟.."
اوزونون رنگي اؤلولر كيمي ايدي. يئنه قان تر ايچينده ايدي. كئچن گئجهلر او آييلماميشدي، قادين دوشونوردو يئنه هر زاد اول كي كيمي اولماقدادير… آمما يئنه بو گئجه.. بير باغيرتي ايله آييلميشدي… قيز چاغيندان اونون شعرلريني ديقّتله اوخوياردي. ائله اونو اونلا تانيش ائدهن ديلسيز آنجاق سؤزلو شعرلري ايدي. اوْ، شعرلرينده ايناملي و يوكسك روحلو بير شاعير كيمي يارانيردي...
ايندي ايسه قادين شعرلردن سؤز آچماقلا اونا اوميد وئرمك ايستهييردي..
ـ "شعرلريم... شعرلريم... شعرلر.." بير بومبا بئينينده پارتلادي. بدهنينه آيدين بير تيترهتمه قوندو. سانكي بدهنينه برق ياپيشديرميشلار. تيترهديكجه اوُچوروملار دوْلور، قارانليقلار گئري چكيليرديلر ذهنيندن.. آغ بير اوتاق.. آجي بير ايينه..
ـ "بوزلو بير سو گتير.. يانيرام.."
سسسيز آغلايان قادين نئچه لحظه اونا باخدي. اونون سسينده گيزلي بير اينام دوُيدو. آياغا دوردو سو گتيرسين... بوغازيندان ايچريآخان سو، ايچري آلووون سؤندوره ـ سؤندوره معدهسينه دولدو. هله ده يانغينليق دويوردو. يئنه سو ايچدي.. پنجرهيه قونان بولودلار آيين اؤنوندن ياواش ـ ياواش گئري چكيليرديلر.. يئنه أزبر اولدوغو تهلكهلي شعرلر ذهنينده ايدي.. ذهنينه قونان توزلار ايندي كاميلجه سيلينميشدي...
آخشام اوستو ايدي. چاليشديغي دوكانين قاپيسين باغلاييب، ائوه ساري گئديردي.. يئنيجه چاپا وئردييي شعر كيتابي چوخلارينين مزاجينا اويغون دوشمهميشدي. بيري تئلئفون دا دئميشدي: "شعرلرينده چوخلو زادلارا ساتاشيرسان؛ بو شعرلر باشيني اودوزاجاق!" بو ايسه گولوب، يالنيزجا: "من شاعيرسم ميلّتيمين سؤيلر ديلي اولمالييام" دئميشدي...
ألينده كي سيغاري خياوانين قورو آرخينا آتدي.. ماشين داليجا ايدي، ائوه گئتمك اوچون... بير آندا اؤنونده آغ بير ماشين داياندي. هله أليني جيبيندن چيخارتمادان، بير قوش كيمي يئردن قالخيب، اؤزونو ماشينين ايچينده گؤردو.. قوللاريندان سرت ياپيشان أللر، ترپنمه گوجونو آلميشديلار اوندان.. گؤزلرينه باغلانان قارا پارچا سانجيردي گؤزلريني... گؤزلري آچيلاندا اؤزونو قفس كيمي بير اوتاقدا گؤردو. قارا بير اوستول اوسته باغلانميشدي، أللريندن، قوللاريندان. نئچه لحظه اطرافينا باخدي. نئچه كؤلگهني مات بير شوشه آرخاسيندان سئچه بيلدي.. اطراف اوتاقلاردان گلن غير عادي و وحشي باغيرتيلار سسي، قورخو سالميشدي جانينا. اؤنوندهكي ماسا اوستوندن اوزونه شاخان كؤزهرمه لامپانين ايشيغي قاماشديريردي گؤزلريني. سول قولوناساري باخدي؛ قولونداكي ساعاتي ايشلميردي… قيچلاري نئچه مدت ايدي قاشينماغا باشلاميشدي. او آندا حاضير ايدي هر نهيين وئرسين، آنجاق بير دفعه اؤزونو قاشيسين. ديزلري آليشيردي. سانكي اود توتموشدولار اونلارا.. ايندي بدهنينين تامام يئرلري قاشينيردي. اطرافينداكي بوغولتولو و آنلاشيلماز سسلر اونو داها وحشته سالميشدي. گؤزلرين وحشيجه شاخان لامپانين ايشيغي سؤكسهده، اونلاري آچيق ساخلاماغا جهد ائديردي. اطرافيندا ويز ـ ويز سسلري اوجاليردي. درين بير چيلغينليقدا اؤزونو حيس ائديردي… باشي اوسته بيريني گؤردو. اوزو گؤرونموردو. باشي لامپانين ايشيغي آرخاسيندا قارانليقدا ايدي. بيردن ساغ قولوندا آجي بير آغريني سئزدي: "ايندي قيفيللانميش ديليز آچيلار.. جهنم ايلييي آچاردير.." نفسين دويدو اوزونده.. گؤزلري شوشه كيمي صاف و احساسسيز ايدي.
بير گيزلين قورخو جانينا دولدو. سسي قوْرودو. نئچه لحظه سعي ائتدي اؤزونو ايتيرمهسين. لاكين دامارلاريندا قان يئرينه داغ قورغوشون دولانماسيني بيردن احساس ائتدي. أللري كئيلشيردي، بارماقلارين ترپتمهيه چاليشدي. ترپنتيلرين دوُيمادي. گؤزلرينين دريسي چكيليردي، بير كيمسه ماققاج ايله چكيردي سانكي.. ديشلري قيفيللاشدي. نفس چكمك اونا ياواش ـ ياواش چتينلشيردي. نه اوچون او وضعيته دوشدويوندن خبرسيز ايدي. اؤز ووقار و دورومون ساخلاماغا چاليشدي. سهند داغي گؤزو اؤنونده ايدي. بز قالاسي دوماندا؛ بابك آتليلاري ايله محو اولوردو اوزاقدا… بير قالين چن، داغي بورويوردو.. نئچه لحظه ايدي عادي حالدان چيخميشدي.سوْدان ديشاري دوشموش باليق كيمي يئر ـ گؤيه آتيليردي. اوتاغين سرين هاواسيندا، هاواسيزليقدان بوغولوردو. دريندن تؤوشويوردو، دالبادال. آغير گلن نفسي، بوغازيندان خيريلتي سسله ائشييه چيخيردي... ياواش ـ ياواش اوزو قاراليردي... بوغازيني سيخيردي بير كيمسه سانكي... گؤزلري حدقهدن ائشييه چيخميشدي.. نئچه لحظه ايدي نفس چكمهيي دوُيولموردو...
قادين، اونون هر آن قيافهسينين دهييشمهسيني گؤرهنده آخيردا:
ـ "نه اولدو سنه؟!" ـ دئيه سوروشدو ـ "قورخوبسان مي؟!"
باشين بوْلادي.
ـ "او لحظهلري بير دفعه ده ياشاماق ايستهميرم.. بيلميرسن او آغ اوتاقدا هوشون باشينا گلنده، مين دفعه آرزو ائديرسن.. آرزو ائديرسن نه ايستهييرلر وئريم آنجاق مني بوْراخسينلار.. بير دفعه ده او جهنم ايلييين تجربه ائتمهييم..."
ـ "هانسي.. آغ اوتاق... نه جهنمي؟!". تعجبله سوروشدو.
ـ "بوراخ!.. چوخ دهشتلي دير.. دئيه بيلمهم.."
ـ "دؤيدولر مي سني؟"
ـ "كاش دؤيهرديلر.. باخ ايكي يول آيريميندا قالميشام.. بيلميرهم نهائدهم؟.."
قادين گؤزلرينه باخدي. نئچه لحظه سوكوت ياري قارانليق اوتاغا حاكيم اولدو.
ـ "من سنين شعرلرينه اينانيرام.. اونلاردا اولان معنالارا دا.. حتماً ميلت ده سنه اينانير.. بير گون بو اؤلكه سنه گووهنهجك!."
ـ "بيليرهم.. بيليرهم نه ائديم..."
l***
ادبيات و اينجه صنعت مجليسلرينده يئني بير كيتابدان سؤز ـ صحبت گئديردي. هامي او كيتاب حاققيندا قيزغين بحثلر ائديردي. اؤزهلليكله اونون بير شعري حاققيندا اطرافلي بحثلر اولونوردو. هامي او شعري جسارتلي و تهلكهلي بيليردي.. او شعرين آدي "جهنم ايلييي" ايدي